Ur lasaietako epaile ikastaroen arrakastaren ondoren, Teleformakuntza bidez burutuko den ur bizietako epaile formakuntza eskaintza berri bat zabaltzen da.
Ur bizietako ikastaroa, azaroaren 16tik 18ra ospatuko da, arratsaldez, 17:00h-tatik 20:00h bitartean, epaile axiliarrentzat.
Oinarrizko edo titulu nazionala eskuratu nahi dutenek, azaroaren 20 eta 23an ere aritu beharko dutelarik, aurretik aipaturiko egunez gain.
Zoom plataformaren bitartez emango dira ikasgaiak eta ikasle orok, ordutegi horretan jarraitu beharko ditu.
Azterketak presentzialki burutuko dira, behin alarma egoera kendu eta baimentzen dutenean, edota osasun egoerak horretarako aukera ematen duenean.
Azpimarratzekoa da formakuntza hau 100%ean dagoela diruz lagunduta, Consejo Superior de Deportesen emakumea eta kirola programaren barnean.
Hemen topatuko duzue ikastaroen informazioa edo web orrialdeko formakuntzen atalean.
Eusko Jaurlaritzak hainbat argitze-dokumentu argitaratu ditu, bigarren alarma-egoeraren deklarazioan hainbat arlotan aplikatutako murrizketei buruz, urriaren 26ko 36/2020 Dekretuaren babespean.
Alde horretatik, batetik esteka honetan, jarduera fisikorako eta kirolerako jarraibideak argitaratu dira, eta, bestetik, Ertzaintzak eta udaltzaingoek beste esteka honetan aplikatzeko irizpideak, hau da, egin daitekeenari eta egin ezin daitekeenari buruzko nolabaiteko argia ematen duten dokumentuak.
Azpimarragarrienen artean, honako puntu hauek ditugu:
Joan naiteke entrenatzera bizi zaren udalerritik kanpo edo ondoko udalerritik kanpo?
Ez, salbu eta kirolari profesionalaren, semiprofesionalaren, Basque Team-en edo goi-mailaren egiaztagiria badago. Lehiatzeko eta entrenatzeko aukera izango dute guzti hauek, taldeak mugatu eta mugikortasuna murriztu gabe.
Zer da kirolari semiprofesionala?
Egutegi ofizialeko Estatuko eta nazioarteko lehiaketetan parte hartzen duten kirolariak dira, baita dagokion Euskal Federazioak antolatutako maila goreneko lehiaketetan ere, guztiak kategoria absolutuan. Atal honetan sartzen dira maila absolutu goreneko herri kiroletako lehiaketak.
Beste herri bateko kiroldegira joan naiteke kirol-jarduera bat egitera?
Bai, baina herri mugakidea bada bakarrik.
Mugikortasunari dagokionez, zer da udalerri mugakidea?
Bizileku-udalerriaren ondoko udalerria da, eta zuzenean sartzen da bertara, mugakideak ez diren beste udalerri batzuetatik igaro gabe.
Espero dugu, dokumentu eta argibide horiekin, kirolari eta klub guztiek gehiago argitu ahal izatea beren egoera eta mugitzeko eta/edo entrenatzeko dituzten aukerak.
Atzo, urriak 26, dekretu berri bat argitaratu zuen Eusko Jaurlaritzak, COVID-19Ak eragindako pandemiari eusteko neurri eta murrizketa berriekin. Kirolaren gaiari dagokionez, honako hau da testuan nabarmenena:
14.– Kirol-instalazioak eta kirol-lehiaketak, -ekitaldiak eta -ikuskizunak egitea.
14.1.– Taldeko edozein kirol-jarduera eten egiten da. Bakarka bakarrik egin ahal izango da kirola. Salbuetsita daude gimnasioetan programatutako ikastaroak edo jarduerak, betiere maskara erabilita, bai eta lehiaketa profesionalean edo erdi-profesionalean murgilduta dauden taldeen entrenamenduak eta kirol-lehiaketak ere.
Talde federatuen edo eskolakoen kirol-entrenamenduak baimenduta daude, seiko taldeetan.
Eten egiten da profesionala edo erdi-profesionala ez den talde federatuen lehiaketa, bai eta 2007. urtean eta hurrengoetan jaiotako ikasleek parte hartzen duten eskola-kiroleko lehiaketak ere, hau da, eskola-orduetatik kanpo eta eskolatze-aldian (16 urtera arte) ikastetxeetan, kirol-instalazio publikoetan edo pribatuetan (kirol-klubetan, esaterako) egiten diren kirol-jarduera antolatuak.
14.2.– Kirol-instalazioetan, baimenduko den gehieneko edukiera izango da instalazioaren edukiera baimenduaren % 50. Taldean ematen diren eskoletan, gehienezko parte-hartzaile kopurua 6 lagunekoa izango da talde bakoitzeko, eta eskola ematen den espazioan puntu honetan ezarritako gehieneko edukiera errespetatuko da.
14.3.– Espazio itxietan egiten diren lehiaketek, ekitaldiek eta kirol-ikuskizunek arriskuak murrizteko plan bat izan beharko dute, eta Osasun Publikoaren Zuzendaritzak ebaluatuko du plan hori. Nolanahi ere, baimendutako edukieraren % 50eko edukiera izan dezakete, gehienez ere 400 pertsonakoa. Instalazioetan pertsonen arteko segurtasun-distantzia mantentzeko beharrezko neurriak ezarri beharko dira, edo, halakorik ezean, babes fisikorako neurri alternatiboak baliatuko dira. Maskara erabiltzea nahitaezkoa izango da, nahiz eta pertsonen arteko segurtasun-distantzia 1,5 metrokoa izan. (Bizikidetza-unitateen kasuan izan ezik, halakoetan ondoz ondoko eserlekuetan eseri ahalko dira eta). Ikus-entzuleak eserita egon beharko dira eta aulkia aurrez esleitzea eskatuko da.
14.4.– Aire zabalean egiten diren lehiaketek, ekitaldiek eta kirol-ikuskizunek arriskuak murrizteko plan bat izan beharko dute, eta Osasun Publikoaren Zuzendaritzak ebaluatuko du plan hori. Nolanahi ere, baimendutako edukieraren % 50eko edukiera izan dezakete, gehienez ere 600 pertsonakoa. Instalazioetan pertsonen arteko segurtasun-distantzia mantentzeko beharrezko neurriak ezarri beharko dira, edo, halakorik ezean, babes fisikorako neurri alternatiboak baliatuko dira. Maskara erabiltzea nahitaezkoa izango da, nahiz eta pertsonen arteko segurtasun-distantzia 1,5 metrokoa izan. (Bizikidetza-unitateen kasuan izan ezik; horiek ondoko eserlekuetan eseri ahalko dira). Ikus-entzuleak eserita egon beharko dira eta aulkia aurrez esleitzea eskatuko da.
14.5.– Aire zabaleko kirol-lehiaketak publikoarekin egiteko, hala nola arraunketa, atletismoa, bideko txirrindularitza, automobil-rallyak eta antzekoak, arriskuak murrizteko plan bat eduki beharko da, Osasun Publikoko Zuzendaritzak ebaluatuko duena. Dena den, ekitaldia gauzatuko den espazioa edo ibilbidea aurrez mugatuko da, eta espazio edo ibilbide bakoitzean gehienez ere 600 pertsona baimenduko da. Bertaratzen diren edo parte hartzen duten pertsonen artean 1,5 metroko distantzia fisikoa mantenduko da, eta maskara nahitaez erabili beharko da.
Euskadiko Piraguismo Federaziotik badakigu egoera honek nahasmena sortzen duela, eta, horregatik, kontsulta egin zaie Euskal Kirol Federazioen Batasuneko zerbitzu juridikoei, eta erantzunaren zain gaude.
Informazio fidagarria izan bezain laster, argitaratu egingo da, gure afiliatu guztiei jakinarazteko zer aukera dituzten kirolariek mugikortasunari eta entrenamenduei dagokienez, sail juridikotik jakinarazten digutenaren arabera.
Datorren asteburuan, Szegeden (Hungaria), Munduko Abiadura Kopa izango da, denboraldi honetan nazioartean antolatuko den abiadura-piraguismoko proba bakarra, COVID-19ren krisiak eragindako osasun-egoeragatik eta kirolari eta taldeek behar bezala entrenatzeko eta normaltasunez bidaiatzeko dituzten zailtasunek bultzatuta.
Bertan bi euskal palista izango dira.
Iñigo Peñak (Itxas-gain Zumaiako Urola Itsas-adarreko p.k.) K2 1000 metroko proban parte hartuko du Gaztela-Mantxako Francisco Cubelos bere taldekidearekin batera, zeinarekin 2018 eta 2019ko Munduko Txapelketetan zilarrezko domina lortu zuen. Aurrekari hauek eta duela gutxi egindako nazio mailako hautatze probetan erakutsitako maila bikainak, Hungariar hiriko pista mitikoan domina bat eskuratzeko aukera handiak dituela pentsatzera gonbidatzen gaitu.
Bestalde, Begoña Lazkanok (Donostia Kayak, K.E.) taldekako ontzietan ere parte hartuko du. Kasu honetan, K2 eta K4 500 metroetan. K2an Laia Pelachs katalanarekin batera, Alicia Heredia eta Isabel Contreras ere batuko direlarik lauko ontzia osatzeko. Lau palistek ondo baino hobeto ezagutzen dute elkar, eta hori, zalantzarik gabe, abantailatzat har daiteke ontzi hauetan beren indarrak bateratzeko orduan, emaitza onenak lortzen saiatzeko ahaleginean.
Federazio honetatik animo guztiak bidaltzen dizkiegu gure bi palistei, euren helburuak bete eta emaitza onekin itzuliko direlakoan, denboraldi ezohiko honi ahalik eta amaiera onena emateko.
Joan den asteburuan Europako Slalom Txapelketa izan da Pragan (Txekiar Errepublika), denboraldi honetan egingo den nazioarteko proba bakarrenetakoa, COVID-19ren krisiak eragindako osasun-egoera dela eta.
RFEPa talde txiki batekin joan zen bertara, baina, ohi bezala, kirol maila handiko euskal palisten ordezkaritzarekin.
Emakumezkoen C1 txapelketan Miren Lazkanok (ATSS) parte hartu zuen, eta bi urtez lesioagatik maila altuko lehiaketetatik kanpo egon ondoren, txapelketa bikaina burutu zuen, finalera sartuz, non zazpigarren amaitu zuen. Emaitza bikaina da, zalantzarik gabe, eta nazioarteko maila gorenera bueltan dagoela adierazten du. Patruilen proban bosgarren postua lortu zuen, bere taldekide batek pala galdu ondoren, 66 segundoko penalizazioa suposatu zuena.
Gizonezkoen K1ean, Joan Crespok (Santiagotarrak, K.E.) eta Samuel Hernanzek (ATSS) aurrera egin zuten kanporaketetan arazo handirik gabe. Finalerdietan Joanek 13. postuan finalista postua lortu zuen, eta Samuel, 4. atean akats bat egin ondoren, nahi baino denbora gehiago galtzea eragin ziona, 20. postua lortu ondoren kanporatua izan zen.
Finalean, Joanek 11. postuan bukatu zuen, emaitza oso positiboa delarik denboraldi arraro eta zail honetan.
Patruilen proban bederatzigarrenak izan ziren.
Azkenik, emakumezkoen K1 mailan, Olatz Arregi (ATSS) kanporatua izan zen bigarren kanporaketan, 8. atean 50 segundoko penalizazioa jaso ondoren. Patruilen proban, 6. postua lortu zuen bere taldekideekin batera. Zalantzarik gabe, bere gaztetasun eta kalitateak etorkizun hurbilean emaitza horiek hobetzeko konfiantza izatera ere gonbidatzen du.
Beraz, denboraldiko lehen nazioarteko proba egin ondoren, une honetatik aurrera datozen diren gertakarien zai geratu beharko dugu, egutegian mantentzen diren probak zeintzuk diren jakiteko. Ziur gaude gure palistek protagonista izaten jarraituko dutela, ospatzeko aukera dagoen txapelketetan.
Pasa den larunbatean, hilak 19, berriz ekin zitzaion jarduerari Kayak Surf modalitatean, IV. Sopela Kosta Fest jaialdia ospatuz, kasu honetan ere Euskadiko zein Bizkaiko Txapelketa izan zena.
Barrika Piragua Taldearen antolaketa lan bikainari esker, proba arrakastaz burutu zen, eta segurtasun osoz osasun arloan, eskatutako protokolo guztiak zorrotz betez.
Kirol arloari dagokionean, maila oso altua izan zen, Euskal Herriko espezialista onenekin.
Gizonezkoen Open HP kategorian Odei Etxeberria (RCNSS) nagusitu zen, eta emakumezkoen artean Ainhoa Tolosa (Hondar Kayak).
Open IC mailan, Gorka Martin (RCNSS) izan zen garailea, bere Open HPko bigarren postua hobetuz, eta beste behin, emakumeen artean, Ainhoa Tolosak (Hondar Kayak) irabazi zuelarik.
Masterretan, HPn Edu Etxeberría (RCNSS) izan zen garailea, IC mailan Oskar Martinez (Mundaka) nagusitu zen bitartean.
GrandMaster HP kategorian, berriz, Txema Carreto (Mundaka) izan zen garailea.
Gazteenen artean, Junior HP kategorian Aimar de la Fuente (Barrika P.T.) izan zen garailea, eta Junior IC mailan Eñaut Calvok (RCNSS) lortu zuen garaipena.
Kadete mailan, emakumezkoen parte-hartzea egon zen, HP eta IC mailan Xiang Messacasa RCNSS taldeko palista izanik irabazlea.
Kluben sailkapenari dagokionez, Donostiako Real Club Nautico izan zen garailea, Barrika P.T. bigarren eta Mundaka S.K.P.E. hirugarren.
Beraz, piraguismo jardunaldi polita izan zen, maila handikoa, eta behingoz Kayak Surf probekin hasteko aukera izan genuen, osasun segurtasun osoz.
Euskadiko Kayak surf Kopako hurrengo proba Lekeition izango da urriaren 24an.
Joan den asteburuan egin zen ezohiko denboraldi honetako Sprint Olinpikoko lehen proba, bakarra ere izango dena.
Irailaren amaieran Szegedeko Munduko Kopara joango diren palistak hautatzeko proba bat izan zen, parte-hartze murriztuarekin.
Baldintza klimatologikoek ez zuten lagundu eta ez zituen gauzak erraz jarri, haizeak gogor jo baitzuen, bereziki larunbatean eta igandean.
Euskal palistei dagokienez, Iñigo Peñak bere faborito izaera berretsi zuen K2 1000 metroko proban, eta bere taldekide Francisco Cubelosekin batera Munduko Kopan parte hartzeko sailkatu zen. K1 1000 metroko proban ere parte hartu zuen, laugarren postu on bat lortuz.
Begoña Lazkanok, bere aldetik, K2 500 metroko proban munduko koparako sailkatzea lortu zuen ere, Laia Pelachs Talde Nazionaleko bere kidearekin batera, eta K1 500 metroko proban zazpigarren postua lortu zuen.
Eneko Egigurenek eta Nerea Garciak ere parte hartu zuten hautatze probatan. Enekoren kasuan, K1 1000 metroko B finalean garaipena lortu zuen, eta K1 500 metroko B mailako finalean laugarren postua lortu zuen, distantzia hauetan bere aurrerapauso positiboa berretsiz.
Nerea Garciak 5. postu bikaina lortu zuen K1 200 metroko proban, eta K1 500 metroko B finalean garaile izan zen. Gainera, K2 500 metroko proban ere parte hartu zuen Barbara Pardorekin batera, helmugara hirugarren postu bikain batean iritsiz, eta garaipenetik oso gertu. Emaitza horiek guztiak merezimendu handikoak izan dira, Nerearentzat senior kategorian lehen urtea dela kontutan izanik.
Emaitza hauen ostean, Iñigo Peña eta Begoña Lazkano Szegedeko Munduko Kopara joango dira, eta bertan emaitza bikainak lortzea espero da, COVID-19aren eraginak markatutako denboraldi honekin amaitzeko.
Euskal Kirol Federazioen Batasunetik ondorengo informazioa helarazi digute:
Hau da protokoloa: kirolari batek edozein sintoma sentitzen duenean, bere etxean geratu behar du eta berehala deitu behar du herriko anbulatoriora egoeraren berri emateko. Osakidetza harremanetan jarriko da kirolariarekin, eta bilatzaileek hurbileko harremanen jarraipena egingo dute, eta erabakiko dute zer pertsonak egiten dizkieten pcr-ak eta nork behartzen dituzten koarentena egitera.
Garrantzitsua da klub bakoitzak arduradun bat izatea kasu horiek kudeatzeko, eta pertsona hori harremanetan jartzea kirolariari aldez aurretik deitu dion Osakidetzako bilatzailearekin, klubaren egoera azaltzeko eta, ahal den neurrian, klubaren barruan izan diren zuzeneko harremanak errazteko.
Copa Euskadi Rios Barrika 2021
