Irailaren 4tik 7ra, Gyorren (Hungaria) Maratoiko Munduko Txapelketa ospatuko da, eta bi euskal palista izango dira bertan.
Alde batetik, Irungo Santiagotarrak K.E.ko Eneritz Aizpioleak K1ean Short Race distantzian parte hartuko du, eta ostegunean ospatuko den frogan sailkatu behar izango da ostiral arratsaldeko finalean parte hartu ahal izateko. Gainera, K2 Junior kategorian ere parte hartuko du Club Fluvial de Lugoko Emily Fernandezekin batera.
Bestalde, Zumaiako Itxas Gain taldeko palista den Irati Osak Emakume Seniorren K2 kategorian parte hartuko du igandean, Eva Barrios zamorarrarekin ontzia partekatuz, zeinarekin brontzezko domina bat lortu zuen Europako Maratoi Txapelketan joan den ekainean.
